Mae Egin wedi’i lansio!

Rydym yn hapus i gyhoeddi bod y rhaglen Egin wedi’i lansio (ar y 7fed o Chwefror, 2023)!

Mae Egin yn cefnogi cymunedau yng Nghymru, yn enwedig y rhai sydd fwyaf agored i newid hinsawdd, i weithredu drwy Fentora Cymheiriaid.

Beth ydy Egin?

Rhaglen newydd ydy Egin sy’n helpu i ddatgloi potensial cymunedau yng Nghymru i daclo newid hinsawdd a byw’n fwy cynaliadwy.

Prif ffocws Egin ydy gweithio gyda grwpiau sydd yn llai tebygol o deimlo’n rhan o sgyrsiau am yr hinsawdd a chynaliadwyedd, ond sydd yn debygol o gael eu heffeithio fwyaf.

Gall grwpiau sy’n ymuno â’r rhaglen gael hyd at 3 diwrnod o gefnogaeth gan Fentoriaid Cymheiriaid – pobl gyda phrofiad a sgiliau mewn sefydlu prosiectau tebyg. Gallant eich arwain i greu Cynllun Gweithredu ar gyfer eich cymuned.

I bwy mae Egin?

Mae Egin yn cefnogi grwpiau cymunedol, elusennau, sefydliadau di-elw ac anllywodraethol, a mentrau cymdeithasol yng Nghymru.

Ein prif ffocws yw helpu’r rhai sydd yn llai tebygol o deimlo’n rhan o sgyrisiau am hinsawdd a chynaliadwyedd neu gael eu cynrychioli ynddynt, ond yn debyg o gael eu heffeithio fwyaf ganddo.

Rydym yn gwahodd yn arbennig grwpiau sydd heb gymryd unrhyw gamau hinsawdd o’r blaen, ac sydd ddim yn siŵr ble i ddechrau.

Sut mae’n gweithio?

Eich cyswllt cyntaf bydd eich Hwylusydd. Mae gan Egin 9 Hwylusydd o amgylch Cymru – cysylltwch â’ch Hwylusydd agosaf i gychwyn, neu cysylltwch â’n tîm canolog.

Gallwch drefnu sgwrs gyda’ch Hwylusydd i ddarganfod os ydy Egin yn iawn i chi. Nid oes unrhyw bwysau i ymuno ar ôl y sgyrsiau yma, a hyd yn oed os ydych yn penderfyni ymuno, mae Egin am ddim i chi.

Pa help gawn ni?

Os ymunwch ag Egin, bydd eich Hwylusydd yn helpu eich grŵp i feddwl am, a phenderfynu ar, syniadau i helpu’ch cymuned i daclo newid hinsawdd neu fyw’n fwy cynaliadwy, a rhoi cymorth i chi weithio ar eich Cynllun Gweithredu. Byddant hefyd yn eich helpu i ddod o hyd i’r Mentor Cymheiriaid iawn i chi – yn seiliedig ar y sgiliau a’r profiad mae eich cymuned ei angen. Byddwch yn cael 1-3 diwrnod o gefnogaeth gan eich Mentor Cymheiriaid (a allai gael ei rannu ar draws mwy nag un Mentor).

Pan fyddwch wedi gwneud cynllun, efallai y bydd eich grŵp yn gymwys i gael grant o £15,000 i helpu gyda chostau prosiect – gallwch gael rhagor o wybodaeth amdanynt yma: Camau Cynaliadwy Cymru – Egin.

Sut mae’n cael ei ariannu?

Mae’r rhaglen Egin ei hun yn cael ei hariannu gan grant Camau Cynaliadwy Cymru – Mentora, a’r grantiau y gallwch wneud cais amdanynt (os ydych yn gymwys) ydy grantiau Camau Cynaliadwy Cymru – Egin.

Gweinyddir y ddau gan Gronfa Gymunedol y Loteri Genedlaethol. Daw’r cyllid o’r Cynllun Asedau Segur – sy’n rhoi arian sydd heb ei gyffwrdd am fwy na 15 mlynedd mewn cyfrifon banc a chymdeithasau adeiladu.

Cysylltwch â ni

Os ydych yn meddwl y gallai eich cymuned elwa o fod yn rhan o Egin, cysylltwch â ni.